TAK Kurdistan Askatzeko Belatzak taldeak bere gain hartu duen erasoa inoiz egin duen handiena da. Nazioarteko berri agentziek argitaratutakoaren arabera, TAKek Interneten argitaratu du Ankarako atentatuaren inguruko oharra, eta erran du Recep Tayyip Erdogan presidentearen politikei emandako erantzuna izan dela. Eraso gehiago eginen dituela ere ohartarazi du. Turkiako presidenteak Siriako kurduen miliziei [YPG Herriaren Babeserako Unitateei] leporatu zien erasoa, eta Ahmet Davutoglu lehen ministroak zehaztu zuen PKKren "laguntza logistikoa" jasoa zutela horretarako. YPGek eta PYD Batasun Demokratikoaren Alderdia Siriako kurduen indar politiko nagusiak gogor ukatu zituzten akusazioak, eta Turkiari leporatu zioten Siria inbaditzeko aitzakia bat prestatzea.
TAKek oharra argitaratu aitzinetik, Erdoganek gaur goizean bertan eutsi dio atzo emandako mezuari. "Rol aktibo bat izan duten hiru izen daude. PYD eta YPGak dira egileak. Ez dugu zalantzarik horren inguruan". Hirugarren "izena" PKK litzateke, Erdoganen arabera. AEBei ere zuzendu zaie: "Zergatik PYD eta YPG ez daude terrorista izendatuta, eta PKK, aldiz, bai?". Erdoganek erran du gaur Barack Obama AEBetako presidentearekin mintzatzekoa dela auziaren inguruan. AEBetako ordezkariek orain arte egindako agerraldietan adierazi dute ez daukatela daturik errateko atentatua nork egin zuen.
Firat agentziak atzo Cemil Bayik PKK-ko buruzagitzako kidearen adierazpen batzuk argitaratu zituen, eta, horietan, Bayikek zioen Ankarako erasoa izan zitekeela "Kurdistango sarraskien aurkako erantzun bat", baina ez zuen zehaztu nork egina.
Militarrak zeramatzaten hiru autobusen aurka bonba auto bat leherrarazi zuten herenegun Ankaran. 28 hildakoetatik 27 ziren militarrak.
