ELA, LAB, EH Bildu, Gure Esku Dago, Etxalde, Steilas, EHNE, CNT, ESK eta Hiruk deituta, 155. artikuluaren kontrako manifestazioa egingo dute larunbatean, Bilbon. 17:00etan abiatuko da, Casillatik, eta 155.ari ez. Demokrazia eta erabakitzeko eskubidea izango da leloa. Atxikimenduak eskatu dituzte.
Ana Perezek (Steilas) eta Ana Castrok irakurri dute deialdia gaur arratsaldean, euskaraz eta gaztelaniaz, hurrenez hurren. 155.aren aplikazioa, Kataluniako espetxeratzeak eta "gertakari errepresiboak" salatu dituzte. "Eskubide zibil eta politikoak errespetatzea, demokrazian sakontzea eta erabakitzeko eskubidea aintzat hartzea da konponbiderako oinarria", esan dute.
