Hiru haur eta heldu bat hil dituzte gaur goizean Okzitaniako Tolosan, eskola judu baten aurrean gertatu den tiroketan. Umeak 5, 6 eta 7 urtekoak dira —6 urtekoa da azkena zendu dena; buruan tiro bat jaso du, eta hil edo biziko egoeran egon da—. Beste hildakoa irakasle bat da. Suhiltzaileen arabera, gutxienez beste bi zauritu daude.
Ozar Hatorah ikastetxean izan da tiroketa, zortziak aldera. Ikasle baten amak esan du gizon bat motoan iritsi dela eta atarian ziren umeei tiroka hasi zaiela; ihes egin du ondoren.
BFM TV katearen arabera, 11,43 kalibrekoak dira bala zorroak, hilaren 11n Tolosan bertan eta 15ean Montaubanen Frantziako hiru militarren hilketetan erabilitakoen eredu berekoak. Orduan ere erasotzaileak moto bat erabili zuen. Pierre Henry Brandet Frantziako Gobernuko Barne Ministerioko eledunak esan du ikerketan gauzak argi izan artean zuhurtzia izan behar dela.
Nicolas Sarkozy Frantziako presidentea Tolosan da. "Izuaren aurrean ezin dugu amore eman", adierazi du. Gertaera "tragedia nazionala" dela dio.
