Kazetaria eta politikaria da Boldrini, 52 urte ditu eta ACNUR Iheslarientzako Nazio Batuen Goi Batzordeko bozeramaile izandakoa da. PDko Pier Luigi Bersani "oso pozik" agertu da aukeraketarekin, uste baitu "aldaketarako seinale bat" dela. SEL alderdiaren (Ezkerra, Ekologia eta Askatasuna) hautagaia zen, PDk babestua.
Senatuan Piero Grasso fiskal ohia aukeratu dute. Zentro-ezkerreko koaliziokoa da Grasso; horrela, zentro-eskuineko Renato Schiffanik baino babes gehiago lortu du.
Ordezkarien Ganberan, atzoko bi bozketetan bi heren behar ziren lehendakaria aukeratzeko: 640 diputatuetatik 420ren botoa. Eta PDk 340 ordezkari ditu. Gaur, laugarren bozketan, nahikoa zuen gehiengo osoa.
Atzo Bersanik iragarri zuen gisan, PD Alderdi Demokratak boto zuria eman zuen bi ganberetan, akordioren bat bilatzeko denbora irabazi nahian; eta PDLk, Silvio Berlusconiren alderdiak, gauza bera egin zuen. Horrenbestez, M5S mugimenduko bi hautagaiak izan ziren —Roberto Fico Ordezkarien Ganberan, eta Luis Alberto Orellana Senatuan— boto gehien jaso zituztenak. 5 Izar Mugimenduak, honek bai, bere hautagaien alde bozkatu baitzuen aurreneko egunetik.
