Espainiako Gobernuak Kataluniaren subiranotasun adierazpena inpugnatuko duela jakinarazi du. Espainiako Estatu Kontseiluak atzo jakinarazi zuen haren ustez Kataluniako Parlamentuaren burujabetza adierazpena inpugnatzeko "nahikoa arrazoi juridiko" badagoela. Organu horrek ez dauka erabakitzeko ahalmenik, baina Espainiako Gobernuaren aholkulari modura egin du txostena, eta Madrili igorri zion, horrek Auzitegi Konstituzionalean helegitea jarri edo ez erabaki zezan. Gaur, Soraya Saenz de Santamariak adierazi du inpugnatzea erabaki dutela. "Gobernu bezala, gure lana legea betetzea da, eta betearaztea", adierazi du Saenz de Santamariak.
Kataluniako Gobernuaren arabera, ordea, alferrik dabiltza. Francesc Homs presidentetzako kontseilariak azaldu duenez, "ez Auzitegi Konstituzionalak eta ez inork ezingo du galarazi adierazpen demokratiko hutsa dena".
Auzitegi Konstituzionalak bost hilabeteko tartean hartu beharko du erabakia.
