Michael D. Higgins 70 urteko politikari laborista izango da Irlandako bederatzigarren presidentea, botoen %39 lortu dituelako, 1.007.104 boz —arratsaldean amaitu dute zenbaketa—. Mary McAleese-ren (Fianna Fail) lekukoa hartuko du karguan.
Haren aurkari nagusi Sean Gallagher enpresaburu independenteak goizean aitortu du Higgins izan dela bozetako garailea. Gallagher bigarren geratu da, %28ekin, 628.114 bozekin. Hirugarren, Sinn Fein alderdi independentistako hautagaia: Martin McGuinness, %13rekin, 265.196 bozekin —Sinn Feinek lehen aldiz aurkeztu du presidentegaia Irlandan—. Fine Gaelekom hautagai Gay Mitchell laugarren, %6rekin, 136.309 bozekin.
Ostegunean izan ziren Presidentziarako hauteskundeak. Zazpi hautagai zeuden, eta Higgins bera da denetan zaharrena. %50 ingurukoa izan da parte hartzea. Hiru milioi pasatxo lagunek zuten botoa emateko aukera.
