NBEren behatzaileen esanetan, erasoa jasandako herrietan usteltze prozesuan zeuden hainbat pertsonaren zein animaliaren gorpuak aurkitu dituzte, baita kiskalitako etxeak ere. «Itxuraz, jendeak denbora gutxi -edo batere ez- izan du ihes egiteko, atzean utzitako etxeko funtsezko gai, elikagai eta aziendatik ondoriozta daitekeenez», azaldu du UNHCR Iheslarientzako agentziako eledun Ron Redmondek.
Zehaztu duenez, erasoetan zauritutakoak 80 bat izan dira. Alabaina, erasoetatik ihesi joandako asko, bereziki zaharrak eta umeak, bidean hil dira, nekeak eta deshidratazioak jota.
Gainera, eskualdeko 31 herritatik ihes egindako 9.000 zibil gutxienez hartu ditu UNHCRk Habile hiriko iheslari eremuan. «Halere, desplazatu berrien kopurua nahasgarria da, laguntza agentzietan egunero jende gehiago agertzen baita».
Azkenaldian Txadeko Gobernuak dio Sudango Gobernuaren sostengua duten janjauid miliziak herritarrei eraso egiten ari zaiela Txaden. Sudango Darfur eskualdeko 200.000 bat errefuxiatu daude Txaden. Gatazka Afrika Erdiko Errepublikara ere hedatu da eta han ere erasoak gertatzen dira.
Sudanek, ordea, Txadi leporatzen dio Darfurko matxinoak -Sudango Gobernuaren kontrako talde armatuak- sostengatzea.
BORROKAK MUGAN. Herenegun Sudango lurretan sartu eta Sudango armadako 17 soldadu gutxienez hil eta 40 bat zauritu izanaz akusatu zuen Khartumgo gobernuak N'Djamenakoa.
Txadeko agintari militarrek ekintza onartu dute, baina argudiatu dute Sudanera sartu zirela bere gobernuaren kontrako matxino txadarren atzetik zihoazelako. Ordu batzuk lehenago esan zutenez, Darfurtik jasandako eraso bati aurre egin zioten, mugatik.
Txadeko ekialdeak eta Sudango Darfur eskualdeak antzeko osaketa etnikoa dute.
