Alberto Nisman fiskalaren heriotza ikertzen ari diren berri iturriek jakinarazi dutenez, fiskalak bere buruaz beste egin zuen hipotesiak du indar handiena. Bere buruari tiro eman ziola diote, eta ez zela izan beste norbaiten esku hartzerik. Dena dela, ikerketak zabalik jarraitzen duela nabarmendu dute, ez baitute baztertzen suizidioa "eragindakoa" izatea.
Fiskalaren heriotzaren biharamunean, Cristina Fernandez Argentinako presidenteak hainbat erabaki hartu ditu fiskala ikertzen ari zen AMIA auziari buruz: besteak beste, auziari buruzko dokumentazio guztia sekretupetik ateratzeko baimena eman du. Halaber, Nismanen ikerketan ageri diren ustezko lau espioiren izen-abizenak ere publiko egin ditu. Horien lekukotzetan oinarritu zen Nisman fiskala Fernandez presidentearen kontrako akusazioak arrazoitzeko.
