Israelgo arkeologoek lurpetik atera dute 2.700 urte inguruko arkeologia aztarnategi bat, Judan (Jerusalem). Hiriaren mendebaldeko gunean aurkitu dute «ohikoa ez den egitura handi hori», eta, bertan, antzinako pitxerren heldulekuak eta buztinezko piezak. Israelgo Antigoaleko Objektuen Agintaritzaren arabera, eskualdean «inoiz aurkitutako» bildumarik «handi eta garrantzitsuenetako bat» da.
Guztira, 120 pitxer kirten aurkitu dituzte, antzinako hebreeraz inskribatutako estanpak dituztela. Batzuek «LMLK» akronimoa dute inskripzioetan: «erregearena» esan nahi du. Beste batzuek, ordea, «Judako Erresumako goi funtzionarioen eta pertsona aberatsen izenak» dituzte inskripzioetan. Horrez gain, emakume, zaldizko eta animalia formako buztinezko piezak topatu dituzte; horiek «gurtza paganorako eta idolatriarako erabiliko ziren, ziurrenik».
Israelgo Antigoaleko Objektuen Agintaritzako Yuval Baruch doktoreak azaldu duenez, Burdin Aroan kokatzen den eremua «funtsezkoa» izan zen «Judako Erresumaren azken garaietako historian funtsezkoa». Gainera, zerikusia du monarkia horren administrazio zentralizatuari lotuta egondako eta «Jerusalemgo eremuan aurkitutako beste toki nagusi batzuekin».
Arkeologoek adierazi dutenaren arabera, Bibliako iturriek diotenez monarkia hori egun Israel eta Palestina dauden eremuaren hegoaldean kokatu zen K.a. X. mendean, Israelgo Erresumatik banandu ondoren. Israelgo Erresuma asiriarrek konkistatu zuten K.a. VIII. mendean, eta Juda babiloniarren esku erori zen K.a. 586an. Konkista horren eraginez, monarkiak gunea utzi egin behar izan zuen, baina, handik gutxira, berriro ere okupatu eta hango jarduera ez zen eten.
