Pakistanen 40 lagun hil dira talibanen aurkako milizia baten kontrako atentatuan

Pakistango talibanen aurka borrokan ari den herritar milizia baten kontra atzo izandako atentatu suizida bikoitzean, gutxienez 40 lagun hil eta 60 zauritu ziren. Mohmand probintziako Ghalanai hiriburuan izandako erasoa bere gain hartu du TTP gerrilla islamistak.

Probintziako administrazio egoitza nagusian, lekuko agintarien eta taliban gerrillariei aurre egiten dien milizia bateko buruzagien arteko bilera egiten ari zirela gertatu zen erasoa. Polizia jantziak zeuzkaten bi ekintzaile joan ziren bilkura egiten ari ziren lekura, eta soinean ezkutatuta zeuzkaten lehergailuak zartarazi zituzten. Leherketek triskantza handia eragin zuten, zeren eta, bi ekintzaile suizidez gain, berrogei bat lagun hil ziren atentatuan. «Badaude 40 hildako, gutxienez, eta 60 bat zauritu, horien artean 25 oso larri daudelarik», adierazi zuen eskualdeko gobernadore Amjad Alik. Hark zehaztu zuen ekintzaileetako batek bere burua zartarazi zuela egoitzaren atarian eta besteak, berriz, bulego batean.

Erasoa gertatu zen unean ehun bat lagun zeuden eraikinaren barruan. Hortaz, hildakoen artean, tokiko administrazioko hamar bat langile badaude. Telebista kate bateko bi kazetarik ere bizia galdu zuten leherketetan. Agintariek ez dute zehaztu, ordea, lekuko agintaririk eta talibanen aurkako miliziako kiderik dagoen ala ez biktimen artean.

Omar Khalid TTP Pakistango Talibanen Mugimenduko tokiko buruzagiak bere gain hartu zuen erasoaren erantzukizuna.