Thailandiako Gobernuak parlamentua desegin eta hauteskundeetara deitzea erabaki du. Bezperan, PD Alderdi Demokratako parlamentariek, legebiltzarra utzi, eta Suthep Thaugsuban lehen ministrorde ohiak gidatu dituen protestekin bat egitea erabaki zuten. "Ildo desberdinetako jende asko gobernuaren kontra agertu delarik, biderik onena boterea thailandiarrei itzuli eta hauteskundeak egitea da", esan du telebista bidezko adierazpen batean Yingluck Shinawatra lehen ministroak.
Manifestariek salatu dute Thaksim Shinawatra aurreko lehen ministroa itzalpetik bere arreba buru duen gobernua gidatzen ari dela, eta, gaur, Bangkok hiriburuan bederatzi zutabe irten dira "azken gudua" emateko prest "Thaksinek erregimen ustelari".
Gobernuaren kontra altxatu direnek ez dute onartzen Yingluck Shinawatrak jarduneko lehen ministro gisa jarraitzea hurrengo bi hilabeteetan, eta gobernuko ardurak beherala uztea nahi dute. Konstituzioaren 7. artikulua baliatu eta Bhumibol Adulyadej erregeak zuzenean gobernuburu bat izendatzeko eskatzen dute.
