Abuztuaren 9an eginiko operazioetan hil zituzten zazpi gerrillariak, Ararat eta Tendurek mendietan. Turkiako Gobernuak ohar batean zabaldu duenez, operazio militarrekin jarraitzeko asmoa du, eta eremu hori "behin-behineko segurtasun militarreko gune" izendatu du. Zibilei bertara joatea debekatu diete.
Azken asteotan ugaritu egin dira PKK Kurdistango Langileen Alderdiaren eta Turkiako armadaren arteko liskarrak, bi urteko su-etena apurtutzat jo ostean. Harrezkero 30 inguru dira hildako Turkiako segurtasun indarretako kideak, eta ehunka PKK-ko gerrillariak.
Turkiako indar armatuen aurkako eraso sorta baten ostean eman du gobernuak operazio militarren berri. DHKP-Ck bere gain hartu du tiroketa bat Istanbulen, eta PKK-k, berriz, polizia-etxe baten aurkako eraso bat.
Su-etenera berehala itzultzeko eskatu du KCK Kurdistango Herri Konfederazioak, zenbait baldintza jarrita; horien artean daude preso politikoak aske uztea, bake negoziazioetarako jokaleku legal bat ezartzea eta bake prozesuak kanpo behatzaileak izatea.
