Afrika
Gose, egarri eta pobre
Itxura guztien arabera, klima aldaketaren ondorioak gordinen jasango dituen kontinentea da. Aurreikuspenak beldurgarriak dira. Ur eskasiarekin lotutako arazoak nagusituko dira, batez ere. 2020. urterako 75-250 milioi lagun gehiago bete-betean ariko dira arazoa jasaten. Nekazaritzan ekoizpenak gero eta eskasagoak izango dira; zenbait lekutan 2020. urterako erdira jaitsiko dira. Tenperatura igo ahala, arrain espezieak galdu eta arrantza kolokan egongo da.
Asia
Glaziarrik gabeko geroa
Himalayako glaziarren urtzea errealitate da, eta gero eta arazo handiagoak eragingo ditu. Epe laburrera, uholdeak eta luiziak; epe luzerago, ur eskasia. Klima aldaketaren ondorioz zenbait gaixotasun, besteak beste kolera, zabalduko diren susmoa dago. Ganges eta Mekong ibaien erriberetanuholde arriskua handituko da.
Australia-Zeelanda Berria
Koralak, galtzeko bidean
Australia hegoaldean eta ekialdean ur eskasia izango da, batez ere, arazo. Kostako zenbait lekutan, berriz, uholde arriskua. Ekologikoki galera handia izango da Arrezife Handikoa; koralak galtzen ari dira. Lekurik hotzenetan tenperatura igoeraren onurak ere igarriko dituzte; energia gutxiago xahutuko dute, eta nekazaritzan jarduteko aroak luzatuko dira.
Europa
Hegoaldea, gero eta idorrago
Klima aldaketaren ondorio negatiboak nagusituko dira Europa ia osoan ere. Europa hegoaldea, bereziki, lehortu egingo da; ur eskasia eta basoetako suteak gero eta arazo ohikoagoa izango dira, eta bero boladak ere bai. Europa iparraldean datozen hamarkadetan lurrak ematen dituen uztak oparoagoak direla ikusiko dute, baina uholde arriskua handitu egingo da.
Latinoamerika
Gero eta baso gutxiago
Amazonas ibaiaren ekialdean tenperaturak igo, eta basoak sabana bihurtuko dira; espezie asko galbidean jarriko ditu horrek. Andeetan glaziarrak urtu ahala ur eskasia jasaten hasiko dira inguru horietan bizi diren pertsonak.
Ipar Amerika
Bero bolada ikaragarriak
Bero bolada latzak jasaten dituzten tokiak badira, eta horiek oraindik ere gordinagoak izango dira. Mendebaldeko mendietan, tenperaturak epeldu ahala, uholde arriskua handituko da hilabeterik hotzenetan, eta udan, berriz, ur eskasiarekin lotutako arazoak hasiko dira agertzen.
Poloak
Aldaketa prozesu betean
Hego poloa eta ipar poloa, biak, aldaketa prozesuan murgilduta daude; izotzak gero eta eremu txikiagoa hartuko du bietan, urtzen ari delako. Ekosistemak guztiz nahastuta daude. Artikoko bizilagunak bizimodu tradizionala utzi beharrean aurkitzendira, baina onurak ere baditu aldaketak: gero eta gutxiago gastatzen dute etxeak berotzen, eta bizimodu erosoagoa dute.
Uharte txikiak
Erosioaren eta uholdeen beldur
Tropikoko zein latitude altuagoetako uharte txikiek etorkizun zaila dute. Gordin jasango dituzte klima aldaketaren ondorioak. Itsasoaren mailak gora egin ahala, erosioa etauholdeak arazo latzak izango dira, eta kolokan jarriko dute uharte askoren geroa.
Espezieen %30 arriskuan jarri ditu klimak
IPCCk klima aldaketari buruzko bigarren txostenean etorkizun pobre eta lehorra aurreikusi duarantxa iraola
«Munduko pobreetan pobreenak, baita herrialde aberatsetako behartsuenak ere; horiek dira klima aldaketak gogorren joko dituenak». Rajendra Pachauri ikertzailearen hitzak dira. Ostiralean Bruselan (Belgika) IPCC Klima Aldaketaren Gobernu Arteko Taldeak -NBE Nazio Batuen Erakundearen baitan dihardu- klima aldaketari buruz egin duen bigarren txostena aurkeztu zuen, erakundeko presidentea baita. Txosten hori klima aldaketaren ondorioei buruzkoa da. Arrunt aurreikuspen kezkagarriak egiten ditu mundu osorako, etsigarriak. Tenperatura 1,5-2,5 gradu igotzen bada, esaterako, espezieen %20-30 gal daitezke.
Horretaz gain, egarri izango da mundua, baina, era berean, uholdeak ugaritu egingo dira. Uztak gero eta urriagoak izango dira, eta glaziarrak, iraganaren lekuko.Aurreikuspen horiek gertatzeko probabilitateak handiak dira. 0,8 gradu igo da ja industrializazio garaitik munduko tenperatura, eta gora doa etenik gabe.
OSASUN ARAZOAK. Osasun arazoak ere aurreikusi ditu txostenak, eta OME Osasunerako Mundu Erakundeak ere ohartarazi du gaixotasunak ugaritu egingo direla, eta malnutrizio arazoak ere bai.
