Nazio Batuen Erakundeak salatu du Israelgo Gobernuak 300 palestinar dituela atxilotuta, eta horiek erasoak jasaten dituztela kartzeletan.
"Israelgo Gobernuak atxiloketa administratibo deitzen die, baina zintzoagoa da kargurik gabeko atxiloketa deitzea, edo zuzenean, atxiloketa arbitrario deitzea", esan du Richard Falk NBEko lurralde okupatuetako kontalariak.
Falken jakinarazi du "iturri fidagarriek" baieztatu diotela kargurik gabeko 300 palestinar daudela Israelgo kartzeletan. Horien inguruko informazioa eskatu du, eta kasu bakoitzaren jarraipena egiteko asmoa duela gaineratu du. Gaia 2012ko ekaineko Giza Eskubideen Kontseilura eraman nahi du.
Preso horiek eraso fisiko nahiz psikologikoak jaso dituztela salatu du Falkek, baita mediku laguntza jasotzeko zailtasunak dituztela ere. Gainjendeztatutako ziegatan bizi direla adierazi du, eta senideen bisitak ezin dituztela jaso.
"Atsekabetuta nago salaketa hauek urte askoan egin direlako, eta geroztik ez delako erreformarik eta aldaketarik izan", azaldu du Falkek. "Nazioarteak lehentasun handiagoa eman beharko lioke preso palestinarren giza eskubideen urraketari".
