Eskoziako independentziari buruzko erreferendumaren bezperan, hari buruz galdetu diote EAJk eta Amaiurrek Espainiako Gobernuari, Espainiako Kongresuko osoko bilkuran.
Aitor Esteban EAJko diputatuaren galderei erantzunez, Mariano Rajoy Espainiako Gobernuko presidenteak esan du prozesu sezesionistak "Europako Batasunaren espirituaren kontrako torpedoak" direla, eta EBk "oso erraztasun gutxi" emango dizkiela banandutako herrialdeei berriro Europako Batasuneko kide izateko.
Xabier Mikel Errekondo Amaiurreko diputatuak, berriz, Jose Manuel Garcia Margallo Espainiako Gobernuko Atzerri ministroari galdetu dio ea zein iritzi duen Eskoziako "ariketa demokratikoaren" inguruan. Margallok ihardetsi dio Erresuma Batuko ordenamendu juridikoa eta Eskoziako auzia "berezitasuna" direla Europako Batasunean, eta erreferenduma Erresuma Batuko Parlamentuak onartu ondoren baino ez dela izan posible.
Eskoziako balizko independentzia "Eskoziarentzat, Erresuma Batuarentzat eta Europako Batasunarentzat hondamendia" izango litzatekeela uste du Margallok, eta iragarri du Eskozia estatu bilakatuz gero "balkanizazio prozesu bat" gertatuko dela Erresuma Batuan.
Inkestak, ezezkoaren alde
Erreferendumerako 24 ordu baino gutxiago falta direla, inkestak argitaratu dituzte The Daily Telegraph, The Scotsman eta Daily Mail egunkariek. Hiru inkestek, zalantzatiak baztertuta, Eskoziak Erresuma Batuan jarraitzeari ematen diote gehiengoa; %52 unionismoaren alde eta %48 independentziaren alde.
Egunkarietan argitaratutako gutun batean, herritarrei mintzatu zaie Alex Salmond Eskoziako lehen ministroa. "Erabakitzeko unea" iritsi dela esan die, eta ordu batzuez herritarrek "euren esku" izango dituztela "burujabetza, boterea eta autoritatea".
