Said blogariaren hiltzaileak zigortu dituzte Egipton

Alexandriako Zigor Auzitegiak zazpi urteko kartzela zigorra ezarri die Khaled Said blogaria hil zuten bi poliziei, eta orain arte bertsio ofizialak esandakoaren kontra egin du. Auzitegiaren arabera, eta kasurako sortu den medikuen batzordeak esandakoa kontuan hartuta, bi poliziek arrazoirik gabe atxilotu zuten, indarkeria neurririk gabe erabili zuten, eta egindako tratu txarren ondorioz hil zen. Zehazki, jarritako poltsak itota, ez hark irentsitako marihuana poltsaren ondorioz, orain arte esan duten bezala.

Said joan den urteko ekainean atxilotu zuten ziberkafe batean zegoela, Alexandrian. Hori baino lehen, Hosni Mubaraken erregimeneko polizien gehiegikeriak erakusten zituen argazki batzuk jarri zituen sarean. Atxilotu, eta hil egin zuten.

Kasuak sutan jarri zituen gazteak; berehala oihartzun handia izan zuen, argazkiak zabaldu zituzten, eta Egiptoko Internet erabiltzaileen iritzi politikoak trukatzeko plataforma bilakatu zen Denok gara Khaled Said gunea, hilabete geroago erregimena amaitzeko eskatzera kalera irten ziren haiexena. Egiptoko matxinoen ikur bilakatu zen blogari gaztea.