SALE EPAI DEZATELA ESKATZEKO, KALERA

Iragan urtarriletik ia ortziralero bezala, milaka lagun karrikara atera ziren atzo Yemengo Sana hiriburuan, Ali Abdula Saleren erregimenaren aurka protesta egiteko. NBE Nazio Batuen Erakundeko mandatari Jamal Benomar Yemenera joan zen atzo, Salek boterea uzteko akordio bat egiteko helburuarekin. Golkoko herrialdeen planaren arabera, Salek boterea utziko luke immunitatea eskuratzearen truke. Oposizioko indar anitz, ordea, ez daude horrekin ados,eta atzo milaka manifestarik eskatu zuten presidentea epaitzeko. Ali Mohsen al Ahmar jeneral desertorearen soldaduek babestu zituzten manifestariak Sanan.