"Hotel txiki baten kontra egindako aireko erasoan 30 martiri daude", berri eman du Almaseera telebistak. Huthiek kontrolatzen dute telebista hori, Yemengo talde matxino batek, xiismoaren adar zaidiaren jarraitzaileak. Reuters berri agentziari iturri medikoek esan diotenez, berriz, 35 dira hildakoak, eta 13 zaurituak.
Sana hiritik 20 kilometrora dago Arhabeko kontrol postua. Erasoaren helburua postu hori zela uste da, handik gertu baitago hotela.
Inork ez du bere gain hartu erasoa, oraingoz, baina Saudi Arabian nagusi den nazioarteko koalizioak kontrolatzen du Yemengo aire espazioa. Azkenaldian, gainera, droneekin erasoak egin dituzte AEBek.
