Sarkozy: "Munduak ezin du Afganistango gerra galdu"

Nicolas Sarkozy Frantziako presidenteak ezusteko bisita egin du Afganistanera. Hamid Karzai Afganistango estatuburuarekin eta NATOk Afganistanen hedatutako nazioarteko indarren buruzagi militar Dan MacNeill jeneral estatubatuarrarekin batzartu da Sarkozy Kabulen.

Hain zuzen ere, babesa agertu dio Sarkozyk Karzairi, eta Frantziako soldaduek han jarraituko dutela hitzeman dio. Izan ere, munduak ezin duela Afganistango gerra galdu iritzi dio: "Bi gauza oso garrantzitsu daude hemen jokoan: aliatuen arteko akordioen sendotasuna eta Afganistan estatu terrorista bat ez bihurtzea. Gerra bat dago hemen jokoan, terrorismoaren kontrako gerra bat, fanatismoaren kontrakoa, galdu ezin duguna".

Hala ere, Afganistango konponbidea ez dela bide militar hutsetatik iritsiko zehaztu du Frantziako presidenteak. Konstituzioa errespetatzeko prest diren talibanekin adiskidetzeko saioa egiten ari da Karzai, eta bide horretan sinesten ez duten NATOko kideen aurrean jarrera hartze bat izan dira Sarkozyren hitz horiek.