Nicolas Sarkozy Frantziako presidente ohiari leporatzen diote L'Oreal enpresaren jabe Liliane Bettencourten zahardadea baliatuta lortu izana 2007ko hauteskunde kanpaina finantzatzeko dirua. Bordeleko Helegite Auzitegiak atzera bota ditu inputatuek Jean-Michel Gentil epailearen instrukzioa baliogabetzeko eginiko eskaerak —bereziki Bettencourten zaurgarritasuna agertu zuen azterketa psikiatrikoa—, eta hamabi inputatuen kontrako salaketak berretsi egin ditu. Horien artean da Sarkozy, eta, auzitegiaren ebazpenari helegitea jar dakioketen arren, horrek ez luke auzia geldiaraziko.
Inputazioa berretsita, Sarkozyri zaildu egin zaio politikaren lehen lerrora itzultzeko izan zezakeen asmoa. Ostiralean UMP alderdiaren ekitaldietan parte hartzekoa da Sarkozy, Nizan eta Frantzia hegoaldeko beste hainbat hiritan. Gaur bertan, Washingtonen hitzaldi bat ematekoa da Frantziako presidente ohia.
