Sinar Corzo giza eskubideen ekintzailea tirokatuta hil dute, Chiapasen, Mexikon

ARRIAGA. Sinar Corzo Chiapasko giza eskubideen ekintzailea tirokatuta hil zuten herenegun gauean, bere etxerako bidean zela, Arriagan, Mexikon. Motozikleta batetik egin zioten tiro. Rutilio Escandon Chiapasko gobernadoreak hilketa ikertuko duela hitzeman du: «Krimen hau ez da zigorrik gabe geratuko». Corzo oso ezaguna zen uraren eta osasunaren defentsan egiten zuen lanarengatik. Arriagako merkatua eraistearen kontrako borrokan ari zen azkenaldian. Aurretik, atxilotutakoa eta torturatutakoa izan zen protestetan parte hartzeagatik.