Adnan Mahmud Siriako Informazio ministroak herrialde arabiarrei, Mendebaldeko herrialdeei eta "talde terroristei" leporatu die Kofi Annan Siriarako NBEren eta Arabiar Ligaren bitartekariaren plana zapuzten saiatzen ari direla. Sana berri agentziak zabaldu duenez, Saudi Arabia, Qatar, Turkia eta AEBak daude herrialde horien artean.
"Herrialde horiek eta talde terroristek plana zapuztu nahi dute, eta horrek erakusten du Siriako herritarrek pentsatutako edozein irtenbide politiko boikoteatzeko asmoa dutela", esan du.
Bereziki nabarmendu du Turkiako Gobernuak "helburu politikoak dituen egoera humanitario bat ustiatu nahi" duela. Horrez gain, Siriako herritarrei eskatu die "terroristei" aurre egiteko eta normaltasunera itzultzeko.
Tokiko koordinazio batzordeek gaur salatu dute gutxienez 30 lagun hil dituztela Siriako Gobernuko segurtasun indarrek.
