Europako Batasunak Siriako Gobernuko hamabi buruzagiri eta Baxar al-Assad presidentearen hainbat senideri zigorrak ezarriko dizkie, gobernuaren eta oposizioaren arteko gatazkaren amaieran aurrerapenik izan ez dela eta. Hala jakinarazi dute Europako Batasuneko iturriek.
Ordezkari horien aktiboak izoztuta geratuko dira, eta ezin izango dute Europako Batasunean sartu. Horiekin batera, Siriako Gobernuarekin lotura duten beste bi erakunderi ere zigorrak ezarriko dizkiete. Zigorrak jasoko dituztenen artean Al-Assaden emaztea dago.
Europako Batasuneko Atzerri ministroek ostiralean onartuko dituzte zigor horiek, Bruselan.
Azken neurri horiek kontuan hartu gabe, dagoeneko 115 ordezkariren aurkako neurriak hartu ditu EBk.
