'USA Today' kazetaren arabera, Siriako oposizioa armaz hornitzea baimendu du Ameriketako Estatu Batuetako presidente Barack Obamak. Etxe Zuriaren arabera, Siriako Gobernuak arma kimikoak erabili ditu.
Ben Rhodesek, AEBetako Gobernuko Segurtasun kontseilariordeak, esan zuen AEBek "laguntza militarra" emango diela matxinoei, baina ez zuen zehaztu zertan datzan.
Etxe Zuriak uko egin dio orain arte oposizioari laguntza militarra emateari. AEBetako Gobernuak argudiatu izan duenez, ez zuen oposizioa armaz hornituko frogak izan arte Baxar al-Assaden erregimenak "marra gorria" —arma kimikoak erabiltzea— igaro duela.
Bestalde, biktimaren izena, hil zen eguna eta lekua egiaztatu ahal izan dituzten kasuak aintzat hartuta, Siriako gatazkan 92.901 lagun hil dira Baxar al-Assaden kontrako mobilizazioak hasi zirenetik, NBEren Giza Eskubideetarako Goi Mandatariak jakinarazi duenez. Gatazkan askoz jende gehiago hil dela uste dute, ordea. Azken urtebetean, hilean 5.000 hildako zenbatu ditu NBEk.
