Sirian gutxienez 30 lagun hil dituzte ortziraleko protestetan

Iragan martxotik ia ortziralero bezala, Bashar al Assaden erregimenaren aurkakoak protestara atera ziren atzo errezoen ondoren, eta, oposizioaren arabera, estatuko indarrek gutxienez 30 lagun hil zituzten hainbat probintziatan. Herri Koordinaziorako Batzordeek diotenez, gehienak Turkiako mugako Idlib eskualdean hil zituzten; hamalau guztira. Erdialdeko Hama probintzian, berriz, sei herritar hil zituzten. Al Assadek informazioaren blokeoa ezarria du, eta datu horiek ezin dituzte berretsi nazioarteko erakundeek edo hedabideek.

Siriako Gobernuak, berriz, kexa formal bat helarazi dio Arabiar Ligari, erakunde horrek bilera egitea hitzartu duelako «bere burua oposiziotzat aldarrikatutakoekin». «Portaera arduragabea» izatea egotzi dio. Nabil al Arabi idazkari nagusiarekin bereziki haserre agertu da Damasko, bertzeak bertze, iragan hilaren 10ean Al Assadekin edukitako bileraren edukien berri emateagatik.