Urtarrilaren 23ko osoko bilkuran onartuko duten subiranotasun aitorpenaren testua adostu dute ERCk eta CiUk. Bertan, "herrien autodeterminazio eskubidearen agerpen gisa, erabakitzeko eskubidea eta Katalunia Europako Batasuneko estatu berri moduan gauzatzeko borondatea" aldarrikatuko dute. Testuaren arabera, Katalunia "subjektu politiko eta juridiko subiranoa" da, eta, horrez gain, "Kataluniako herriaren subiranotasun demokratikoa" jasotzen du adierazpenak.
Subiranotasun adierazpena zenbait printzipiotan oinarritzen da, CIUk eta ERCk adostutako zirriborroaren arabera: Kataluniaren subiranotasun legitimoa, gardentasuna, Espainiako Gobernuarekiko eta nazioarteko ordezkariekiko elkarrizketa eta legezkotasuna eta EBren oinarrizko printzipioak, dauden oinarri legalak erabilita.
Hauteskunde programan erabakitzeko eskubidea txertatu zuten beste alderdiei helarazi diete testua. PPC eta Ciutadans alderdiek ez dute zirriborroa jaso.
