Surten sartu dira matxinoak, Gaddafiren jaioterrian, eta auzo bat okupatu dute

Erregimenaren aldeko indarrek lau gune dituzte kontrolpean Libia osoan: Bani Ualid (Tripolitik 150 kilometro hego-ekialdera), Sabha (basamortuan, hiriburutik 750 kilometrora), Jufrako oasia, eta Surt. Azken hiri horretan sartzea lortu dutela jakinarazi dute matxinoek. Gaddafiren jaioterria da, eta, horregatik, garrantzi sinboliko handia du bi aldeentzat.

Mohamed Obeid milizianoak jakinarazi duenez, auzo bat okupatzea lortu dute erreboltariek, hiriaren mendebaldetik sartuta. Misratako Otsailaren 17ko Aliantzako kidea da Obeid, eta Surten sartu diren lehenbiziko milizianoak Misratakoak direla erran du. Hiri hori Surt eta Tripoli artean dago, eta gatazkaren hasieran mendebalde osoa Gaddafiren kontrolpean zegoen bitartean, matxinoek hilabeteetan eutsi zioten setioari.