Talibanei pixa eginez marineek egindako bideoa «deitoragarria» da, AEBen ustez

AEBek talibanekin bake negoziazioak hasiko dituztela esan eta ordu gutxira marine estatubatuarren gaineko bideo bat jarri dute YouTuben, eta sekulako zalaparta eragin du. Horrenbesteko zalaparta sortu du, non Pentagonoak agindu baitu ikertu egingo duela zer gertatu zen. Talibanei «ankerra» iruditu zaie bideoan ikusten dena, baina negoziazioekin jarraituko dutela esan dute. Eta AEBei «deitoragarria» iruditu zaie bideoa: lau soldadu agertzen dira, marine-en uniformez jantzita, ustez hiru talibanen gainean. Odoleztaturik daude gorpuak, eta marine batek hildako bati «egun ona izan» esaten entzuten da. CNNren arabera, Pentagonoko arduradunek uste dute bideoa benetakoa dela eta Afganistanen gertatua.

Leon Panetta Defentsa idazkariaren hitzetan, «erabat desegokia da» jarrera hori, eta talibanen bozeramaile Zabiualah Muyahidentzat, «inbaditzaileak are gehiago gorrotatzen» laguntzen dute horrelakoek.