Gero eta argiago dago, eta, gaur-gaurkoz, Donald Trump eta Hillary Rodham Clinton izango dira AEBetako presidentetzarako hautagaiak. Astearte Handia zuten atzo, eta errepublikanoen artean egindako bozetan Trump garaitu zen 11 estatutatik zazpitan. Emaitza bera lortu zuen Clinton demokratak ere. Nolanahai ere, oraindik ez dago ezer erabakita.
Clintonek botoa eman zuten demokraten %60 baino gehiagoren botoak jaso ditu Alabaman, Arkansasen, Georgian, Tennessen, Texasen eta Virginian; Massachusettsen, berriz, irabazi arren, gertu gelditu zaio Bernie Sanders. Azken hori Oklahoman, Minesotan, Coloradon eta Vermonten nagusitu da. Clintonek berretsi du bera dela alderdiko hautagai nagusia, baina Sandersek uste baino emaitza hobeak izan ditu, eta eusten ari zaio lehiari.
Trump erraz gailendu da Alabaman, Massachussettsen, Tennesseen eta Georgian; eta alde txikiagoz Arkansasen, Vermonten eta Virginian. Ted Cruz nagusitu da Texasen eta Oklahoman. Garaipen horrek areagotu egin du alde errepublikanoaren zatiketa; izan ere, Trump hautagai sendo bat bihurtu da, femomeno bat izateari utzita, eta krisia eragin du, alderdiaren irudia desitxuratzen eta muturreko jarrerak suspertzen ari delako.
