Greziako Legebiltzarrak ez du murrizketen garaira itzuli nahi, Alexis Tsiprasen aldeko konfiantza mozioa babes handiarekin irten baita aurrera. Syriza alderdiko parlamentarien 149 botoei, haiekin akordioa egin zuten Anel alderdi eskuindarraren hamahiru parlamentarien botoak gehitu zaizkie. Hala, 162 botoen babesarekin onartu da Syrizako liderraren aldeko konfiantza mozioa —300 parlamentarik osatzen dute Greziako Legebiltzarra—. Igande arratsaldean aurkeztu zuen Tsiprasek bere gobernu programa, eta egunotan legebiltzarrean izan dute eztabaidagai.
Babes hori lagun dutela parte hartuko du egunotan Greziak bi bilera erabakiorretan; arratsaldean, Gianis Varufakis Greziako Finantza ministroak Eurotaldearekin du bilera; eta bihar, Alexis Tsipras lehen ministroak Europako Kontseiluko bere lehen bilera izango du. Azken egunotako mugimenduei erreparatuta, oso zail izango dute kideak konbentzitzeko.
