Alderdi Komunistaren urteko biltzarrean erabaki dute Xi Jinping Batzorde Militar Zentraleko kide bihurtzea. Atzo amaitu zuten kongresua; eta atzo eman zuten, halaber, hartutako erabakien berri. Lau egunez egin dituzte bilerak, ateak itxita eta sekretupean, eta horregatik, ez dute xehetasun handirik eman: Xiren alde egitea erabaki dutela eta hurrengo bost urteetarako ekonomia planari oniritzia eman diotela, baina ez askoz gehiago.
Erreforma politikorik, haatik, ez dute iragarri. Liu Xiaobo disidente txinatarrari Bakearen Nobel saria eman ziotenetik, Mendebaldea berriro presio egiten hasi zaio Pekingo gobernuari; halaber, etxean ere ehunka lagun bildu dira erreforma demokratikoak eskatuz. Ez dute aldarrikapen horiek askorik mugitu, ordea,Alderdi Komunista. Urteko kongresuan ere, hala, ez da Mendebaldeko agintariek espero zuten eztabaidarik gertatu.
Alderantziz, Txinaren oraingo garai ezegonkorretan alderdiaren gidaritza eta lidergoa indartzeko apustua egin dute buruzagi komunistek. «Alderdi komunistaren aginte gaitasuna hobetzeko, gogor lan egin behar dugu. Herrialdearen garapen ekonomiko eta sozialaren lidergoan lehiakor izateko duen berezko gaitasuna indartu behar dugu», dio alderdiak argitara emandako agiri ofizialak.
Txinako Alderdi Komunistan 78 milioi lagun daude afiliatuta egun -munduan kide gehien duen alderdia da-. Horregatik, zail egiten da hura koordinatu eta kide denak helburu bakar baten alde dihardutela bermatzea. Hala eta guztiz ere, hura zuzentzea egokitu zaienentzat alderdia bera Txinaren helburuak gauzatzeko «bermea» da.
Erreforma ekonomikoak
Gaur-gaurkoz ezer gutxi atera da argitara Xi Jinpingen soslai politikoaz; nazioartean gutxik ezagutzen dute, eta txinatarren artean gehienek bera baino hobeto ezagutzen dute emaztea: Peng Liyuan; izan ere, folklore txinatarreko izar bat da hura, eta entzute handikoa, ondorioz.
Haatik, bera nabarmendu da Alderdi Komunistaren urteko biltzarrean. Eta, Willy Lam Hong Kongeko Unibertsitate Txinatarreko irakasleak ondo adierazi duen moduan, ohitura bihurtu den gisa, militarren babesa bermatu ondoren gertatu da. «Mao Zedongen tradizioari segitzen dio Alderdi Komunistak; pistolaren kanoia da botere iturri oraindik»; alegia, herrialde gidatuko duena zein izango den erabakitzeko orduan armadaren iritziak pisu handia duela.
Hu Jintao presidenteak ere beste bat zuen begiko, izan ere. Li Keqiang lehen ministrordearen figura nahi zuen nabarmendu -Li Gazteria Komunistako kide da, eta fakzio horrek beti egin du presidentearen alde-. Hori dela eta, askok uste dute hurrengo lehen ministro bera izango dela.
Xi Jinping, berriz, printze komunista da; iraultza komunistan heroi izandako baten ondorengoa, eta, beraz, agintean egoteko hezia. Printze komunistek alderdikosektore kontserbadoreenak ordezkatzen dituzte.
Xi Jinping
Printze komunista
Txinako presidenteorde da egun Xi Jinping, eta 57 urte ditu. Xi Zhongxun, aita, gerrilla komunisten sortzaile izan zen, eta heroitzat daukate horregatik. Haren seme delako deitzen diote printze komunista Xi Jinpingi. Hori dela-eta uste da agintari izateko sortu zutela.«Maoren tradizioari segitzen dio Alderdi Komunistak: pistolaren kanoia dabotere iturri oraindik»
WILLY LAM
Hong Kongeko Unibertsitate Txinatarreko irakaslea
