Kremlinek erabaki hori hartu du "udaberrirako aurreikusitako entrenamendu fasearen amaiera" dela eta. Halaber, Vladimir Putin Errusiako presidenteak poza azaldu du Kievek eta Ukraina ekialdeko independentistek lehen kontaktuak izan dituztelako, "parte guztiak barne hartu behar dituen elkarrizketa zuzen bat ezartzeko asmoz".
"Indarkeria eta zigor operazioa etetera deitzen du Errusiak, eta baita tropak erretiratzera eta arazoak modu baketsuen bidez konpontzera ere", dio Kremlinen oharrak.
Datorren igandean egingo dituzte Ukrainako presidentetzarako hauteskundeak, eta, sei egun falta direla, PCU Ukrainako Alderdi Komunista legez kanporatzeko eskatu dio Oleksandr Turtxinov Ukrainako behin-behineko presidenteak Justizia Ministerioari. Turtxinoven arabera, "herrialdearen segurtasuna eta lurralde osotasuna mehatxatzen dituzten ekintzetan" parte hartu du alderdiak. Viktor Janukovitx Ukrainako presidente ohiaren Lurraldeen Alderdiko aliatu izan ohi da Alderdi Komunista.
Turtxinoven ustez, komunisten jarrera politikoek "izaera antikonstituzionala" dute, eta "terroristei laguntzea" egotzi die. Kievek Ukraina ekialdean abiatutako operazioa eteteko eskatu du Petro Simonenko PCUko buruak, eta Kieveko behin-behineko agintariek zilegitasunik ez dutela esan izan du.
