Yemenen, ihesaldi batek 50 pertsona hil ditu kirol zelai batean

Yemen hegoaldeko Ibb hiriko kirol zelai nagusian atzo gertatu zen ihesaldi baten ondorioz, 50 lagun gutxienez hil ziren. Yemengo presidente Ali Abdala Sale mitin bat ematen ari zelarik gertatu zen ezbeharra, datorren irailaren 20an izango diren presidentetzarako hauteskundeen karietara.

«Hildakoen kopurua 50etik gorakoa da eta zaurituena 100dik gorakoa», adierazi zuen izena ematea gura ez zuen segurtasun zerbitzuetako goi arduradun batek. Balantze hau, haatik, zalantzazkoa geratzen zen atzo iluntzean, zeren eta, beste iturri batzuek hildakoen kopurua 42koa eta zaurituena 80 ingurukoa zela iragarri baitzuten.

Sanaa hiriburutik 170 kilometro hegoaldean dago Ibb hiria. Mitinean 150.000 lagun inguru bilduta zeuden. Lekukotasunen arabera, presidentearen mintzaldia amaitu zelarik jazo zen istripua. Mitinetik irteten ari zirenen eta kirol zelaira sartzeko aukerarik izan ez zutenen artean gertatu zen, antza, bultzakada.

Presidentetzako hauteskundeak datorren irailaren 20an izango dira Yemenen, eta Ali Abdala Sale jarduneko presidenteaz gain, beste lau hautagai lehiatuko dira boz hauetara. Nolanahi ere, Sale da faborito nagusia, iritzi azterketen arabera.

INDARKERIAZ JOSITAKO BOZAK. Yemenen indarkeria ohikoa izaten da hauteskundeetan eta presidentetzarako bozen kanpaina joan den abuztuaren 30ean hasi zenetik hildakoak eta zaurituak egon dira Gobernuaren eta oposizioko indarren jarraitzaileen artean izandako borroken ondorioz. Hala, Jaufeko hirialdean gertatutako tiroketa batean, hiru lagun hil eta beste zortzi zauritu ziren. Hautagai baten iloba bat ere hil zuten, joan den abuztuaren 28an, Lahaj herrian.

Atzoko ihesaldiaren gertagune izan zen Ibbeko hauteskunde barrutia da Yemengo kopurutsuena. Honetan erroldatuta daude 900.000tik gora hautesle eta nahiko indartsu daude bertan Ali Abdala Saleren agintearen aurkari diren Al-Isla alderdi islamistakoak.