Orain sei hilabete pasatxo piztu zen gerra ahaztu nahian, Donetskeko eta Luhanskeko herri errepubliketan hauteskundeak egin dituzte. Gobernuburua eta parlamentariak aukeratzera deitu zituzten hiru milioi herritar inguru. Emaitzen arabera, Donetsken Aleksandr Zakhartxenko egungo Donetskeko Herri Errepublikako buruzagiak %70eko babesa jaso du, garaipena eskuratuz. Juri Sivokonenko eta Aleksander Kofman hautagaiak lehiatu dira harekin.
Bestetik, Luhanskeko Herri Errepublikan egungo lehen ministro Igor Plotnitski, Oleg Akimov sindikalista, egungo Osasun ministro Larissa Airapetian eta Viktor Penner negoziolaria lehiatu dira. Plotniskik irabazi ditu hauteskundeak, botoen %63,8 eskuratuta.
Hautagaien artean ez dago desberdintasun handirik estatu ereduaren inguruan. «Hauteskunde kanpaina ez da inportanteena. Arazo asko ditugu gure herrialdean, osasun sistemarekin adibidez, eta nork bere buruaren alde egitea ez litzateke arduratsua izango», azaldu zion atzo Airapetianek Itar Tass agentziari. Bere estatu ereduari buruz ere hitz egin du: «Zuzenbide estatuan oinarritutako errepublika bat nahi dut, Errusiari lotutakoa».
Kieven eta Moskuren arteko harreman gatazkatsuetan azken liskarra eragin dute bozek. Ukrainako Gobernuaren arabera, «legez kanpokoak» dira, eta ez dute gatazka konpontzen laguntzen. Kieven alde lerratu da Mendebaldea, eta ez die zilegitasunik ematen, «berme demokratikoak» betetzen ez dituelakoan. Gerra egoeran amilduta daude eskualdeak, eta ez dituzte errolda zerrenda egiaztagarriak. Errusiara ihes egindako iheslariek eta Kieven menpeko Luhansk eta Donetsk eskualdeetako herritarrek ere bozkatu ahal izan zuten, helbide elektronikoaren bitartez edo Donetskeko Hauteskunde Batzordearen webgunean.
Su-etenak, eragin gutxi
Errusiak bestelako jarrera du. «Argi dago ez direla zehatz-mehatz Ukrainako legearen arabera egingo. Eta zer? Inporta duena emaitza da», esan zuen Vladimir Txizhovek, Errusiaren EBko ordezkariak. Behatzaileen presentziak zilegitasuna eman zien bozei, Errusiako Atzerri Ministerioaren arabera. ESLA Europako Segurtasun Lankidetzako Antolakundeko behatzaile batzuek Donetsk eskualdeko hauteslekuak aztertu dituzte egunotan.
Su-etena irailaren 5ean adostu izanagatik, arma hotsak ez dira guztiz isildu Ukraina ekialdean. NBE Nazio Batuen Erakundeak kaleratutako txostenak erakusten du meniaren hauskortasuna: azken hamar egunetan bakarrik 300 lagun hil dituzte. Guztira, 4.000tik gora dira hildakoak.
Hauteskundeak egin bezperan, bi aldeek elkarri leporatu diote erasoak egin izana. Ukrainako armadak esan du matxinoek gutxienez sei soldadu hil dituztela Donetsk eskualdean. Gainera, Luhansk eskualdeko Krimske herria bonbardatzea leporatu die. Bestalde, Donetskeko Udalak ohartarazi du hirian hainbat leherketa entzun direla.
