Bartzelonako 20. instrukzio auzitegiko epaileak inputatu egin ditu Bartzelonako Raval auzoan Juan Andres Benitez enpresarioaren atxiloketan parte hartu zuten Esquadra Mossoetako zortzi ajenteak. Indarrez atxilotu eta ordu gutxira hil zen Benitez, eta atxiloketa uneko bideoek, bizilagunek atereak, polemika eragin zuten polizia indarkeria erakutsi zutelako. Espainiako Poliziak egindako txostenean, mossoek atxilotuari buruan kolpeak eman zizkiotela jaso zuten, behin immobilizatuta zeukatelarik.
Epaileak iritzi dio neurriz gaindiko indarkeria erabili zutela mossoek atxiloketa unean, eta azaroaren 13an deklaratzera deitu ditu zortzi ajenteak.
