Fernandezen duintasunaren errespetua eskatu dute Baionan

Bihar aztertuko du Parisko Auzitegiak Ibon Fernandez Iradi euskal presoak gaixotasuna dela-eta bere kartzela zigorra kentzeko egin eskaera, eta atzo eguerdian Baionan bildutako 300 lagunek legea ezartzea exijitu zuten, gaixotasun larriak dituzten presoen eskubidea oroitaraziz, «legegileak neurri hori idatzi zuelarik, helburu humano batzuekin egin baitzuen».

Fernandez Iradik esklerosi anizkoitza dauka; aurreneko aztarnak 2010eko bukaera aldean atzeman zizkioten, Espainiako Valdemoroko espetxean zenean. Harrezkero, eritasunak okerrera egin du. Iazko urtarrilean, diagnosia berretsi zuten sendagileek.

Giza eskubideen sinboloa azpimarratzeko, giza katea Rene Cassinen sortetxetik abiaturik Suprefeturaraino osatu zen atzo. «Hemen gara, beraz, kondenaren etetea exijitzeko», erran zuen Herrira mugimenduak.

Artatze egokiaren beharra

Lannemezango (Okzitania) espetxean da Fernandez, eta haren gaitzak artatze bereziak eskatzen ditu. Sail anitzetako medikuen jarraipena behar du —neurologo, psikiatra, oftalmologo, fisioteraupeuta, eta abarrena—, baita erizainen segimendua ere. «Preso egoteak gaixotasunaren okertzea» ekartzen duela salatu du Herrira-k, eta zehaztu du euskal presoak bere kondenaren eteteko beharrezkoak diren baldintza guztiak betetzen dituela.

Mugimenduaren arabera, gatazkaren konponbidean «anitz dira euskal presoen egoera eta haien etorkizunaren kudeaketa ezinbestekoa» dela diotenak, «eta «Ibon Fernandezen egoera enblematikoa bilakatu da»

Ekainaren 14an Giza eskubideak! Konponbidea! Bakea! lelopean Baionan eginen den martxara joatera dei egin du Herrira-k.