EH Bai-k dei egin du Batera-ren protestara joateko azaroaren 30ean

Frantziako Gobernuaren «mespretxu itzela» gaitzesteko, azaroaren 30ean Maulen Batera-k antolatu manifestaziora joateko deia egin zuen atzo EH Bai koalizioak. Pariseren partetik den «borondate politiko falta» deitoratu zuten Peio Etxeberri-Aintzart (AB), Xabi Larralde (Sortu) eta Filipe Dulucek (EA) atzo Baionan egindako prentsaurrekoan. Euskal lurralde elkargoaren aldarriari emandako «erantzun faltaz» gain, gobernuak egindako «xantaia» gogor salatu zuten.

Gobernuaren hainbat joera eta erabaki gaitzetsi zituzten: «Izan gatazkaren konponketari buruz, izan aitorpen instituzionalari buruz, zein arlo sozialean, gobernuak duen joera zinez negatiboki iruditzen zaigu».