Protestak herrialde arabiarretan

Larrialdi egoera «hurrengo egunetan» kenduko du Aljeriak

Gobernuak uste du azken egunetako protestetan parte hartu duten herritarrak «gutxiengoa» direla

Erredakzioa -

2011ko otsailak 15
Aljeriak 1992an ezarri zuen larrialdia egoera, «terrorismoari» aurre egiteko. Horren bidez, gobernuak kaleko manifestazioak eta elkarretaratzeak debekatu ditu, bertzeak bertze. Abdelaziz Buteflika Aljeriako presidenteak hil honen hasieran azaldu zuen larrialdi egoera bertan behera uzteko asmoa, eta, atzo, Atzerri ministro Murad Medelcik berretsi zuen «hurrengo egunetan» kenduko dutela. «Zuzenbide estatua bueltatuko da, eta iritziak emateko askatasuna legearen arabera baimenduta egonen da».

Azken protestei buruz ere mintzatu zen Medelci. Horietan parte hartu duten herritarrek Aljeriako gizartearen «gutxiengoa» ordezkatzen dutela uste du. «Ez dira areagotuko». Medelciren ustez, erreboltek «ezin diete eskualdeko herrialde guztiei eragin». Larunbatean 2.000 lagun elkartu ziren Aljerren, eta gobernuak 30.000 polizia mobilizatu zituen manifestazioa zaintzeko. Herenegun, berriz, Annaba hirian (ekialdean) 7.000 lagunek lana eskatzeko manifestazioa egin zuten, eta gutxienez hamar lagun zauritu ziren Poliziarekin edukitako liskarretan.

Istiluak Yemenen

Yemenen, berriz, Sana hiriburuan borrokak izan dira Ali Abdala presidentearen aldekoen eta oposizioko jarraitzaileen artean. 3.000 lagun inguruk Tahrir plazan Saleren aurka protesta egiteko asmoa zuten, baina bidean erregimenaren aldeko ehunka jarraitzailek eraso diete. Manifestariak Sanako Unibertsitatean babestu dira. Poliziak handik bidali ditu ondoren. Hegoaldean, Taez hirian, lau lagun zauritu dira erregimenaren aldekoen eta aurkakoen arteko istiluetan.

Atzokoa Saleren aurkako hirugarren protesta eguna izan da jarraian. Boterean jarraitzeko, Konstituzioan aldaketak egiteko asmoa zuen Salek, baina oposizioaren presioaren eraginez bertan behera utzi zituen erreformak hil honen hasieran, eta 2013an ez da bozetara aurkeztuko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna