Arraun-minez

Irabazteko moduak

Felipe Eizagirre -

2013ko uztailak 30
Galiziak eta Getaria-Tolosak utzitako hutsuneek gatz gutxiko Euskotren liga iragarri ziguten neguan. Zumaiak blokeari eutsi zion; eta iazko jarduna kontuan hartu eta beste koska bat gora egingo zutela pentsatuta, aurten erabat nagusi izango zirela aurreikusi genuen; eta hala ari dira izaten. Baina San Juanek eta Hibaikak pauso eta erdi aurrera egin izanak piper pixka bat behintzat gehitu dio lehiari.

Zumaiarrak dira nagusi; eta gozamena da haiek arraunean ikustea. Bi ligak eskura dituzte, eta faboritoak izango dira Kontxan ere. Inor gutxik egingo du apustu haien kontra Portaletas birtualetan. Euskotreneko sailkapenean eroso jardun zuten, eta gerora ere nabarmen nagusitu ziren; aurkariei ateratako aldeagatik baino, ateratzeko moduagatik: trapuak azken txanpan erritmoa ia igo beharrik izan gabe pilatuz aurkeztu baitziren larunbatean Getxora. Arraunlariek hustuta bukatu zuten arren, kanpotik erraz ikusten genituen.

Azken bi saioek paisaia aldarazi dute, ordea. San Juanek, Getxon irabazi eta Zumaian etxeko taldea estututa, asteburu ederra osatu du (balio beza talde osoa zoriontzeko!). Iaz ere erakutsi zuten batelariek, lehen luzean eutsiz gero, banderen lehian egon zitezkeela; eta larunbatean berretsi egin zuten hori. Zailena egin zuten: irteeran aurre hartu ondoren, zumaiarrek atzetik aurrera pasatu zituztenean, erasoari eutsi eta meritu handiko saioa borobildu. Bandera irabazi izanak baino gehiago balioko die arrosei irabazitako moduak. Igandean, bestalde, Zumaiak ohiko aldeaz irabazi arren, ohiko erritmotik gora egin izanak harritu gintuen; eta estutu beharra izan zutela pentsarazi. Eta Hibaika ere ez dabil aparte. Getxon ezustekoa emateko zorian ere egon zen une batean. Talde gisa beste bien sendotasuna ikusten ez diodan arren, kontuan hartzekoa dela agintzen digute emaitzek. Zerbait ariko dira ongi egiten beltzezkoak ere! Zumaia da faboritoa, dudarik gabe; baina lehia irabazteko moduek ikusteko esperantza esnarazi digute, behintzat, hori maite dugunoi.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna