35/02 sumarioko eta gazte mugimenduko auzipetuek ELAren babesa jaso dute

«Lan munduaren ikuspegitik» 35/02 sumarioko eta gazte mugimenduko auzipetuen kontra urrian egingo diren epaiketen inguruan abiatu daitekeen dinamikari buruz hitz egin eta sindikatuen erantzun bateratu baten inguruan aritzeko elkartu ziren atzo auzipetuak eta ELA sindikatua azken horren egoitzan, Donostian. Joseba Alvarez, Juani Lizaso eta Jone Goirizelai izan ziren ordezkariak lehen taldean, eta Amaia Muñoa izan zuten buru bigarrenean. «Tonu onean» egindako bilera izan zen, eta ontzat jo zuten bi aldeek amaieran proposatu eta hitz egindakoa.

Auzipetuek alderdi politiko, sindikatu eta herri elkarteekin abiatutako bilera erronde artean lehenengoa izan zen atzo ELArekin egindako hori. Amaia Muñoa sindikatuko zuzendari nagusiaren albokoak gogor kritikatu zuen hamaika urteren ostean «batere frogarik gabe» egitera doazen epaiketa «ez hanka ez bururik gabea», eta horrelakoekin beti egin izan duten moduan euren «salaketa» argi eta irmoena erakutsi zuen.

Konpromiso eske joan ziren auzipetuak bilerara, eta ELAren «konpromisoa» izango dutela jakinarazi zien Muñoak. Auzipetuek langileen balizko erantzunaren inguruan egindako proposamenak aztertzekotan gelditu ziren ELAkoak, eta proposamen horien inguruan «hausnarketa egin eta sakontzekotan».

Horixe izan baitzen atzoko bileraren funtsa Joseba Alvarez auzipetuak jakitera eman zuenez: «Langile mugimendutik eman daitekeen erantzuna eta babesa zein izan daitekeen aztertu nahi genuen. Guk gure proposamenak jarri ditugu mahai gainean, erantzun bateratu baten inguruan, besteak beste. Haien harrera ona izan da, aztertzekotan gelditu dira, eta elkarrizketa bat ireki dugu bi aldeen artean». Alvarez eta Muñoa elkarrekin agertu ziren prentsaurrera, amaieran.