Aukerarik eman gabe

Pablo Fustok 3-0 irabazi dio Esteban Gaubekari finalean, eta hirugarren aldiz jantzi du munduko txapela
Fusto, kaskorik gabe, garaipena ospatzen, finala irabazi berritan.
Fusto, kaskorik gabe, garaipena ospatzen, finala irabazi berritan. J. H. / ARP

Imanol Magro -

2013ko apirilak 21
Buruz buruko munduko txapelketako aurkezpenean, faboritotzat jo zuten, eta hilabete eta erdi geroago Pablo Hernan Fustok bete egin ditu pronostikoak. Esteban Gaubekari inolako aukerarik eman gabe, 3-0 irabazi zion finalean, atzo, Bilbon. Lehen bi jokoetan askoz gehiago izan zen, eta hirugarrenean ondo baliatu zituen aurkariaren opariak. Argentinarrak buruz buruko hirugarren munduko txapela du, eta bigarrena jarraian.

Fustok txapelketa aro bikaina josi du lau hilabetean. Otsailean, binakakoa irabazi zuen, Larrinagarekin, eta atzo bakarka ere onena dela erakutsi zuen. Ondo erakutsi ere. Ligaxkako partida estua izan zen —Gaubekak 3-2 irabazi zuen—, baina finalak ez zuen orekarik izan. Hein handi batean Gaubekak ez zuelako bere guztia eman. Lehen jokoan, Fusto 7-3 aurreratu zen, sakearekin asmatuz. Gaubekak tartea jan zuen (9-7), baina ez zen urrunago joan.

Bigarrena izan zen desorekatuena. Fusto bikain sartu zen ezker airez, eta ahal izan zuen guztietan pauso bat eman zuen aurrera. Oso oldarkor jokatu zuen, piloteoan Gaubekari apurka tartea jateko. Jokoa ia bost minutu etenda egon zen, 2-0ekoan Gaubekak pala hautsi zuelako. Etenaldiak kalte handiagoa egin zion Armintzako txapeldun ohiari, eta Fustok erraz egin zituen setaren bukaera artekoak (10-3).

Hirugarren jokoa izan zen orekatuena. Gaubekak aurrea hartu zuen lehenbizi (2-4), eta, gero, seina berdinduta egon ziren. Bizkaitarrak, baina, hiru falta egin zituen saketik, eta hala ezinezkoa da txapelik irabaztea. Azken tantoan, Gaubekak gora bidali zuen pilota, Fustok aurreko pilotakada errebotean sartu ondoren (10-8).

Txapela jantzita, Fusto hunkitu egin zen: aita gaixo du, eta hari eskaini zion txapela. Finala aztertzean, berriz, sakearekin asmatu izanaren garrantzia nabarmendu zuen. «Beste partidetan baino hobeto sakatu dut, eta asko lagundu dit, piloteoan oldarkor jokatu ahal izan dudalako».

Xarea, Ibarran

Erremintak Ibarran du gaur hitzordua (Gipuzkoa, 16:30), bertako trinketean Ametsa pilota elkarteko xare txapelketako finala jokatuko baita. Apeztegia-Lopetegik eta Lizaso-Vinuesak neurtuko dituzte indarrak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna