Gemma Urteaga bertsolaria nagusitu da Eskolartekoan

Mikel Iturriotz izan da txapeldunorde, eta gaztetxoetan, Zarauzko taldea izan da garailea, Leitzakoari irabazita
Gemma Urteaga, txapela jantzita, finala irabazi eta gero.
Gemma Urteaga, txapela jantzita, finala irabazi eta gero. JON URBE / ARP

Erredakzioa -

2013ko ekainak 23
Gemma Urteagak (Beasain 1995) irabazi zuen Euskal Herriko Eskolarteko Bertsolari Txapelketako finala, atzo, Orioko Karela kiroldegian (Gipuzkoa), eta Mikel Iturriotz (Urretxu, 1995) izan zen bigarrena, txapeldunordea. Gaztetxoen mailan, Zarauzko taldeak irabazi zuen finala, eta Leitzakoa izan zen txapeldunorde. Zarauzko taldea Ane Peñagarikanok, Jone Makazagak, Libe Goenagak eta Irati Tolosak osatu zuten. Leitzakoa, Joanes Ilarregik, Xabat Ilarregik eta Oier Altzelaik.

Bertso saio ona egin zuten helduen mailako hamar finalistek, eta Urteaga txapeldunak bertsoa akatsik gabe josteko trebetasun handia erakutsi zuen saio osoan. 15 eta 18 urte bitarteko bertsolariak aritzen dira helduen mailan, eta maila horretan azkeneko urtea dute hala Urteaga txapeldunak nola Iturriotz txapeldunordeak. Gainerako parte hartzaileak honako hauek izan ziren: Peru Abarrategi (Aramaio, Araba, 1997), Iñaki Tena (Gasteiz, 1995), Txaber Altube (Abadiño, Bizkaia, 1998), Ander Gerrikaetxebarria (Zornotza, Bizkaia, 1996), Ortzi Murua (Azkaine, Lapurdi, 1995), Aitor Servier (Azkaine, Lapurdi, 1997), Mikel Lasarte (Barañain, Nafarroa, 1996) eta Maddalen Lopez (Lesaka, Nafarroa, 1996).

Jende ugari eta giro ederra

Giro ederrean jokatu zen finala, eta jende ugarik jarraitu zuen bertsolari gazteen jarduna, Orioko kiroldegia betea zela. Iñaki Murua Bertsozale Elkarteko lehendakaria, Arantza Manterola Ikastolen Elkarteko lehendakaria eta Patxi Etxeberria eta Sustrai Colina bertsolariek banatu zizkieten sariak bertsolari gaztetxoei.

Maddi Sarasuaren lekukoa hartu du Gemma Urteagak atzoko garaipenarekin. Gaztetxoetan, Peru Iruretagoiena izan zen iazko txapelduna.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna