Komunikazioa

Klaudio Landak eztabaida saio bat aurkeztuko du astero ETB1en

Ostegun gauean 40 lagunetik gora izango dira platoan iritzia ematen, Erpinek ekoitzitako 'Debatea'-n
Klaudio Landa aurkezle bizkaitarra.
Klaudio Landa aurkezle bizkaitarra. EITB

Urtzi Urkizu -

2012ko abenduak 27
2013. urtearen hasieran ETB1ek izango duen berrikuntza nabarmenena Debatea zuzeneko saioa izango da. Urtarrilaren 10ean estreinatuko dute, eta ostegunero emango dute prime time ordutegian. Aurreneko saioko gaia Eusko Jaurlaritza berriaren erronkak izango dira.

Erpin ekoizpen etxeak egingo du programa, eta zuzendaria Luis Oiartzabal izango da. Ni más ni menos saioa ETB2 katean ekoizten du Erpinek, eta azkenaldian ikusle datu oso onak lortzen ari da (azaroan bataz beste %15,6ko ikusle kuota). Klaudio Landak aurkezten du ETB2ko programa, eta ETB1eko saio berria gidatzeaz ere bera arduratuko da.

«Euskal gizartean ahoz aho dabiltzan eta gaur-gaurkoak diren gaiekin zerikusia dutenak jorratuko ditugu. Horretarako ideologia askotako jendea gonbidatuko dugu», iragarri du Klaudio Landak.

Platoan 40-50 pertsona inguru bilduko ditu astero Debatea-k, harmailetan kokatuta. «Gai bat aukeratu, eta horren inguruan galdera bat planteatuko dugu. Bi orduko saioan bestelako hainbat azpigai azalduko dira», dio Landak. «Eusko Jaurlaritzaren erronkak dira lehen gaia, eta hor hainbat kontu azalduko dira: gai ekonomikoak, normalizazioaren ingurukoak eta beste hainbat».

Eztabaidan parte hartuko duten lagunak lau multzotan banatu dituzte: mintzakide finkoak (saio batean baino gehiagotan parte hartuko duten iritzi emaileak), adituak (gaiarekin lotura dutenak), testigantzak (horiekin elkarrizketa laburrak egiteko aukera izango du Landak) eta herritarrak. «Guztiek emango dute iritzia, pisu berdintsuarekin», aurreratu du aurkezleak. «Gaien arabera datuak emango ditugu, eta ikerketa batzuk hartuko ditugu abiapuntutzat. Grafikoak eta bideoak erabiliko ditugu horretarako». Euskal Herriko zein atzerriko EITBko berriemaileekin zuzeneko konexioak egiteko aukera ere izango dute euskarazko programa berrian. «Iritzia emateko beste bide bat, berriz, telefonoarena izango da. Ikus-entzuleekin konektatzeko modu bat izango da. Azken boladan maiz erabiltzen dut telefonoarena ETB2ko saioan».

'Ni más ni menos'-en ere bai

Klaudio Landak ETB1eko saio berriaz gain, arratsaldero ETB2ko Ni más ni menos aurkezten jarraituko du. «Gaur-gaurko gaiak lantzen oso gustura nabil. Bi urte egingo ditugu otsailean Ni más ni menos-ekin, eta eroso nago formatu horrekin. ETB1ekin hasiko dugun programa berriarekin eroso sentitzeko arrazoiak ikusten ditut».

Ostegunetan bi kateetan ariko da aurkezle Landa. «Lanak gustura egiten direnean eramangarriagoa da. Esfortzua izango da, baina esfortzu gisa bainoago aukera gisa ikusten dut».

Debatea saioko lantaldearen helburuen artean dago ikusle datu onak lortzea. «Produktu serio eta on bat eskaintzea da lehen helburua. Baina beharrezkoa da audientzia onak lortzea, eta asmo horrekin goaz. Ea euskal ikusleeen artean tartetxo bat lortzen dugun eta datu onak eskuratzen ditugun».

Platoan gonbidatu ugari izango dira, eta, horretarako, antolaketa ona beharko du taldeak. «Teknikoki ez da erraza izango, baina 0 programek erakutsiko digute bidea. Iritzi asko eskaintzea erronka bat izango da».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna