Titin III.ak eta Aspeko buruak bilera sekretu eta «adeitsua» izan dute Eibarren

Titinek eta Fernando Bidarte aspeko buruak bilera egin zuten atzo goizean, enpresak Eibarren duen bulegoan. Ordubetez mintzatu ziren, pilotariak iragan larunbatean eginiko kritikei buruz, eta, enpresako iturriek argitu dutenez, «adeitsua» izan zen. Berez sekretua zen, enpresako langileek ere ez zekiten biltzekoak zirenik, baina Astelenako pilota aukeraketara joaniko kazetariek Bidarte eta Titin ikusi zituzten euren autoen bila zihoazenean.

Aspek asteazkenean emango du bileraren nondik norakoen berri, Bidartek eta Titinek Eibarko hotel batean emango duten prentsaurreko batean. Dena den, ez da espero inolako zigorrik, bien arteko harremana ona delako. Prentsaurrekoan azalpenak emango dituzte, eta bakoitzak bere jarrera azaldu. Iaz antzeko afera bat egon zen, eta orduko hartan Sebastian Gonzalezek irten behar izan zuen hedabideen aurrera.