Futbola. Europako Ligako finalerdiak: Sporting Lisboa-Athletic

Bielsa: «Sportingek, ziurrenik, atzean itxarongo digu»

Athleticeko teknikariak baieztatu du Ekiza ariko dela eta gaur arte ez dutela jakingo Muniain prest egongo den edo ez

Jon Eskudero - Berriemaile berezia

2012ko apirilak 19
Final baten atarian egotea ere ez da nahikoa arrazoi Marcelo Bielsak atzean utz dezan hain berezkoa duen muturreko zuhurtzia. Athleticeko entrenatzaileak berriro erakutsi zuen atzo Sportingen aurkako joanekoaren bezperan euforiak edo gehiegizko konfiantzak ez dutela tokirik bere izaeran. «Irabaziko dugula? Irabazteko ilusioa dugu, baina ez da komeni irabaziko dugula esatea», azpimarratu zuen prentsaurrekoa hasi bezain laster.

Aurkariaz, berriz, azpimarratu zuen Sportingek «eskarmentua» duela eta ziurrenik «atzean itxarongo» diela. Ricardo Sa Pintoren laudorioak ere izan zituen hizpide. Entrenatzaile portugaldarrak Pep Guardiola eta Jose Mourinhoren pare jarri du Bielsa. Athleticeko entrenatzaileak, hala ere, ez du uste ezer egin duenik haien pare egoteko.

Hasierako hamaikakoari dagokionez, baieztatu egin zuen Borja Ekizak jokatuko duela Javi Martinezen ordez. Iker Muniainen osasunaz, berriz, esan zuen gaur arte itxaron beharko dutela jokatzeko moduan dagoen edo ez jakiteko.

Iraola: «Ez dago faboritorik»

Andoni Iraolak, berriz, ez zuen kanporaketako faboritoaren rola hartu nahi izan. «Ez dago faboritorik. Bi taldeok gara indartsuak, historikoak, eta biok kanporatu ditugu talde indartsuak: haiek Manchester City eta guk Manchester United eta Schalke. Biek dugu aukera bera finalerako sailkatzeko».

Athleticeko kapitainarentzat ez da arrotza Sporting Lisboa. Aitzitik, Portugalgo taldeaz jakin beharrekoak badakizkiela erakutsi zuen. «Sporting Lisboa ez da Manchester United edo Schalke bezain talde erasokorra. Hori bai, jokalari arriskutsuak ditu aurrealdean. Van Wolfswinkelek du ardura erasoan, eta taldekideek hura bilatzen dute etengabe. Lan horretan garrantzi handia dute zelai erdiko hegalekoek, Izmailovek eta Diego Capelek. Hegaleko atzelariak ere asko igotzen dira. Ondo zaindu beharko ditugu».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna