Stephen Frearsen 'Philomena'-k oso harrera ona izan du Venezian

Stephen Frearsen Philomena filmaren emanaldia izan zen atzo Veneziako zinema jaialdiko unerik gogoangarriena, batez ere Judi Dench aktorearen lan bikainarengatik. Aktore emakumezko onenaren Volpi saria irabazteko hautagai nagusien artean kokatu dute adituek Dench. Nerabe zela haurdun geratu eta hura hazi ezinik umea adopziorako uzten duen emakume bat da Philomena, filmeko pertsonaia nagusia, eta benetako istorio batean du oinarria filmak. Askoz harrera hotzagoa izan zuten atzo Sail Ofizialean aurkeztutako beste bi filmek: James Francoren Child of God eta Kelly Reichardten Night Moves. Philip Groenigen Die Frau des Polizisten-ek ere ez zuen, herenegun, harrera berorik izan.