Zuhaitzen babespean

Irria ezpainetan, walkie talkie eskuetan, eta beti gauza errepikatzen ari. «Aparkalekua eskuinetara». Eta zaku beteekin etortzen direnentzat, bada, eskuak eta bizkarrak erabili behar: «Horrela heldu den urtean puxka gutxiagorekin dira etorriko». Iban Thikoipe EHZ Idauze Mendin egiten denetik da aparlekuetako arduradun, matematikako irakasle da berez. Bederatzi urte lanean, eta kontzertu gutxi ikusten, ez bada bat ere. Baina, ez du kexu iduri. «Nehork ez du lan hau egin nahi eta», eta norbaitek egin behar. «Festibala beste gisa batez bizitzeko aukera». Eta anekdotak trumilka. Nola jendeak festibala bururatzerakoan beti eskertzen dituen, iragan hiru egunekin pozik. Nola Heletako urte hartan, Manu Chaok bere kontzertua eman zuen, alde guztietatik kaosa nagusitu zela, goizeko zortzietan hasi txanda biharamuneko goizeko lauetan bururatu zuen. Azken garagardo bat edatera hurbildu zela jaialdiko kontzertu lekura, guztia hutsik aurkitu zuen, denak oihaletxeetara lotara sartuak.

EHZ jaialdia laguntzaileek dute egingarri egiten, eta aurten ere berdin; Thikoipe bezala, 600 dira orotara, aparkaleku, komun idorren zaintze, patata erretze, ttantto banatze, artisten behar betetze, teknikari, eta beste milaka lanetan. Gehiago dena, laguntzaile gehiegirekin gertatu da lehen aldiz jaialdia, atzoko eta gaurko. Biharko, ordea, oraindik beharra badagoela zehaztu dute arduradunek. Eta lan egiteaz interesatua den orori aurkituko diotela zer egin.

18. edizioa du jaialdiak, eta, hasieratik laguntzaileak eta langileak aldatu diren arren, belaunaldi batetik bestera esperientzia transmititzen jakin izan dute. Beti hobetu nahian. Urtez urte ideia eta praktikak koherentzian jarri nahian, dela naturarekiko errespetua, euskararekilakoa, auzolanean eraiki jaialdiak berezitasun hori aurten lema egin duela.

Eta eremu aldetik, toki egonkor bat aurkitzeko dituen zailtasunak gaindituz aldiz bakoitz. Laugarren eremua du EHZ jaialdiak Lekorne. Baina segidan jarri dela erakutsi du atzoko lehen egunak. Aro ederrak lagun, eta eguna hasteko denbora hartu baldin badu ere, usaian bezala.

«Badute meritu jaialdia hasteko programatu dituztenek», publikotik. Skandalue, Zuloak eta Alice Francisek ukan zuten betebehar hori. Publiko gutxi aitzinean, eta eman behar. Giroa berotu behar. Eskandalua pentze erdian, elektrikak busti txaranga modura, Zuloak talde punkia bazterreko eszenan eta eszena nagusian Alice Francisen charleston elektronikoa. Jende gutxi baina zeudenak adi, eta Alice Francisen kasuan harrituak. Ezagutzen ez zutelako, eta kontent ikusi zutenaz.

Ostirala lan eguna, gehienak berandu iritsi, eta izen handiko kontzertuak ere berant jarri zituzten. Halere, jada, Xutik taldearentzat dantzan ari ziren zangoek errautsa sortzea lortu zuten.

Keny Arkanaren taupadak

Publikotik hartu komentarioen artean, lekua «berdeago» aurkitu dute, zuhaitzek presentzia handia dutela, eta xutik baina hondatua den gazteluak «xarma» ekartzen diola lekuari. Azken lau urteetan Heletan zela, herri barnean, herriko plazak eta ostatuen artean, herritik kanpoko aurtengo jaialdiak, agian «festibalago» egiten duela. Eta laguntzaileen aldetik, lekuaren kudeaketa doi bat sinpleago egiten zaiela adierazi dute batek baino gehiagok.

Zehazki zenbat sartze egin dituzten ezin jakin lerro hauek idazterakoan. Baina, Keny Arkana rap kantariarekin jadanik eszena nagusiko pentzea beltzatzen hasia zen, eta eskuak laxatzen, ahoak kantuz, zangoak saltoka. Euskal Herria ez duela entzuten oihukatu eta, segituan erantzun bizia publikotik.

Keny Arkana Idauze Mendira etorri zen lehen aldiz jaialdira. Orduan anitz harritu zituen, eta geroztik bat baino gehiago zeuden hura entzuteko zain. Rap kantari frantsesaren energia salatzaileak, berriz ere, ez zuen huts egin. Hor zituen, anitzen artean, Willis Drummond taldekoak eta Fermin Muguruza, beren kontzertuaren aldia etortzekoa zitzaiela. Elkarrekin kantu bat emateko prest, aurtengo jaialdiaren kantua dena.