Nafarroa Bizirik taldeak martxa nazionalera deitu du ekainaren 16rako

Beste hamaika ekitaldi antolatu dituzte egun horretarako, eta herritarrei parte hartzeko eskatu diete

Irene Arrizurieta -

2012ko apirilak 15
Martxa nazionalera deitu du heldu den ekainaren 16rako 1512-2012 Nafarroa Bizirik mugimenduak. Martxa Iruñeko Antoniutti parketik aterako da, 17:30ean, eta Gazteluko plazan bukatuko da.

Nafarroako konkistaren 500. urteurrenaren ekitaldien barruan, 1512-2012 Nafarroa Bizirik mugimenduak, martxa ez eze, beste hainbat ekitaldi antolatu ditu. Goizerako, Iruñerriko auzo eta herrietan ibilaldiak antolatu dituzte Iruñeraino, tartean, Getzetik abiatuko dena. Han, Noaingo borrokaldia gogoratuko dute Joxe Ulibarrenak guda hartan hildakoen alde eraikitako eskulturan. Eguerditik aurrera, zezen plazan azoka eginen da: eskulangileak egonen dira, eta oroimen historikoa berreskuratzea xede duten elkarteen informazio mahaiak ere bai. Herri kirolak eta bertso saio berezi bat ikusteko aukera ere izanen da. Herri bazkariaren ondotik, 17:30ean, martxa abiatuko da Antoniutti parketik Gazteluko plazaraino. Aldarrikapen eguna zezen plazan bukatuko da: 20:00etatik aurrera, musika jaialdi bat eginen da bertan. Jaialdian, hainbat talde izango dira: Barricada, Su Ta Gar, Vendetta eta Goienetxe Anaiak.

Euskal Herriko herri guztiei parte hartzeko deia egin die 1512-2012 Nafarroa Bizirik mugimenduak. «500 urte igaro eta gero, herri hau bizirik dagoela erakutsi behar dugu», adierazi zuen Sergio Iribarren taldeko partaideak martxa antolatzeko ekitaldian, atzo. Hogeita hamarren bat lagun bildu ziren Karlos III.a zinemetan, martxa nazionalaren alde.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna