Neguan sortutako mandeuliak

Kunbia, korrido eta runba erritmoekin batu du eskusoinua Mandoilek taldeak bere lehen diskoan
Mandoilek taldekoak, beren lehen diskoaren diseinu lana eskuetan dutela.
Mandoilek taldekoak, beren lehen diskoaren diseinu lana eskuetan dutela. MONIKA DEL VALLE / ARGAZKI PRESS

Iñigo Astiz -

2013ko apirilak 27
Hotzetik sortu dute beroa Mandoilek taldekoek. 2011ko neguan batu ziren lehenengoz Igon Olaguenaga eta Asier Linares, eguneko lanak bukatuta, Amurrion (Bizkaia), denbora-pasa aritzeko asmoz: trikitia eskuetan bata eta baterian eserita bestea. Ongi pasatzeko asmoz hasi ziren trikitiari kunbia, korrido eta runba erritmoak batzen, eta hala ari zirela, uda heldu zen. Hor lehen mandeuliak negu betean. «Dantzarako gogoa sortzen duen musika da gurea». Kantak pilatuz joan, eta kide berriak batu zitzaizkien taldera: David Ferreño baxu jotzailea, Andoni Vera gitarra jotzailea, eta Unai Mendibil abeslaria. Berrogei kontzertu eman dituzte formatu horrekin, eta taldearen izen bereko lehen diskoa kaleratu dute orain (Elkar).

Bizitzaren alde argian kokatu dute beren burua taldekideek. Eta alde horri kantatu nahi izan diote. Horregatik, dantzagarriak dira kantarik gehienak, eta ludikoa da haien asmoa. «Erakutsi nahi izan dugu dena ez dela balada malenkoniatsua. Ipurdia mugitzeko zer edo zer aurkeztu nahi izan dugu». Disko osoa hartzen du festa gogo horrek, eta erritmo biziak dira nagusi, baina bada erritmo lasaiagoko kanta pare bat ere. Be Quiet izeneko reggae kanta da bata, eta Joan eta etorri maitasun kanta bestea.

Parranda giroko hitzak

Hitzetan ere agerikoa da jarrera bizizale hori. Unai Mendibil abeslari eta bertsolariarenak dira hitzak, eta, dioenez, parranda girokoak dira abesti asko. Hori da Bilboko auzo ezagunari eskainitako Bilbi kantaren kasua, eta baita La Espuela izenekoarena ere. Baina badira gai arantzatsuagoei buruzkoak ere: emakumeen aurkako indarkeriaz mintzo da Maria Cristina, esaterako, eta ustelkeriaren aurkako salaketa da Be Quiet, Please.

Kolaboratzaile sorta izan dute diskoa grabatzeko. Samalda bat, egia esanda. Rap kutsuko tarte batzuk txertatu dituzte 121 Crew taldeko kideek eta Askapen Dub taldeko Gorka Suaiak, esaterako. Baina askoz ere luzeago den zerrenda bateko lehenak baino ez dira. Urrutitik kantu abestia hautatu dute single modura emateko, eta Naroa Gaintza abeslariak lagundu ditu ahotsarekin. Euskal presoei eskainitako kanta bat da, lelo itsaskorrekoa: «Maite duzun hori/ esan ziguten zaintzeko,/ eta distantziak/ ez ditu aldenduko:/ zuengatik gara/ ilunpetatik argira./ Garelako bihar ere/ izango dira».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Iñigo Astiz

Informazio osagarria

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna