Komunikazioa

LABek galdetu du EITBn ahal den langile gutxien uztea den xedea

Urgellek plazaratutako datuen harira, «utzikeria, ezintasuna eta inprobisazioa» aipatu ditu sindikatuak

U.U. -

2011ko urriak 8
Eusko Jaurlaritzak EITBri emandako dirua datorren urtean %8,4 gutxiago izango dela iragarri zuen herenegun Blanca Urgellek. Halaber, kontratu programa berririk ez dutela egingo adierazi zuen. EAJk esan du azken erabaki horrekin EITB hondoratu egin daitekeela.

EITBko LABek, berriz, hainbat gogoeta eta galdera egin ditu: «Mugimendu hauek inprobisazioa edo ezintasunaren ondorio dira? Bestela, aurretik diseinatutako estretagia bati erantzuten al diote? Hau da, azken helburua ez ote da EITBn ahalik eta langile gutxien uztea, bakarrik kudeatzailez osaturik, gainontzeko lan guztiak azpikontratatuz». Sindikatu abertzaleak, halaber, honako gogoeta egin du: «Mugimendu inprobisatuak zein estrategikoak izanda ere, EITBren egoerari erantzuten al diote soilik, ala zerbitzu publiko guztiei egiten zaien eraso baten barruan kokatzen al dira? Hau da, krisialdiaren aitzakia erabiltzen da administrazio publiko guztiak husteko eta kudeaketa pribatua bultzatzeko?».

EITBko zuzendaritzak esan du proposamena «adostu» nahi duela. Baina, LABen arabera, ETBko lan poltsa ez sinatzeko aitzakia nahiko adostasunik ez zegoen aitzakia jarri zuen, sindikatuen ordezkarien %93k bat egin zutenean. «Hala bada, lantaldea husteko ere ez du adostasunik edukiko, LABek ez baitu onartuko».

Bestalde, EITBko zentroarteko batzordeak eta zuzendaritzak berriki egindako bileran, batzordeak kanpoko zerbitzuak kontratatzearen aurka jo du, eta Miramongo langile eta instalazioak ez direla ganoraz aprobetxatzen adierazi. ETBko zuzendariak erantzun zuen kanpoko zerbitzuak hartzeko prozesua ez dela azken urteetan asmatutako zerbait, eta aurreko zuzendaritzei ez zitzaiela kritika bera egin. ETBko langileek grebara jo zuten esternalizazioaren aurka.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna